⛈ शाळेतला पाऊस ☂

असे म्हणत मोठी झालेली आमची पिढी अन् Rain Rain Go Away, Little Jhony Wants To Play शिकणारे आजचे चिमुकले. अरे जॉन्या, एकदा पावसात भिजून तरी बघ लेका!

बालपणीचा पाऊस बालमनासारखा निरागस, अल्लड! धो धो पडणाऱ्या पावसात आईचा हात धरून , मस्त रेनकोट घालून शाळेत जाणे-येणे म्हणजे मज्जाच मजा! मोठ्यांची नजर चुकवून हळूच पावसात भिजण्याची गंमत. पावसाळ्यात आकाशात दिसणाऱ्या इंद्रधनुष्याचे कोण अप्रुप!! 🌈

पाणी साचलेल्या मैदानात कागदाच्या होड्या सोडणे. त्याकाळी मी इतका श्रीमंत होतो की पावसाळ्यात माझी दहा पंधरा कागदी जहाज चालतं समुद्रात (मैदानातल्या) ⛵. शाळेत शिकवलेली पंखहोडी, नांगरहोडी, राजाराणीची होडी, बंबहोडी तयार करून हस्तकलेच्या वहीत चिकटवणे हीपण एक कला होती. आता साधी होडी बनवता येते का बघा प्रयत्न करून 😀 • •

वीज चमकणे म्हणजे आकाशातून कोणीतरी फोटो काढला समजणे आणि ⚡ वीजेचा गडगडाट म्हणजे आकाशातील घुडूऽऽम् म्हातारी दळण दळतेय. कसल्या मजेशीर कल्पना होत्या विज्ञानाच्या पलिकडल्या! वीज कडाडल्यावर मात्र मी घाबरून घरात धूम ठोकत असे. पावसामुळे शाळेला मिळणारी सुट्टी म्हणजे लॉटरीच. पावसात थोडसं जरी डोक भिजलं तरी, सर्दी होऊ नये म्हणून स्वतःच्या पदराने आपलं डोक पुसणारी आईची माया!

थोडे मोठे झालो आणि मराठीच्या तासाला ...

ही बालकवींची कविता समजू लागली. लहानपणीचा रेनकोट गेला आणि छत्री हाती आली. आता, भीती न आम्हा तुझी मुळीही गडगडणाऱ्या नभा ! विनाकारण पावसात भिजत फिरणे. मित्रांसोबत पावसात ⚽ फुटबॉल खेळणे. बिनधास्त मैदानातील चिखलात पडणे. तेव्हा तर किटाणूनाशक साबणपण नव्हते आणि किटाणूंची हिम्मत पण नव्हती आमच्यावर हल्ला करायची.

घरच्यांचा धाक मनाच्या कोपऱ्यात कुठेतरी असे, पण त्याक्षणी मित्रांसोबत पावसाचा आनंद घेणे ह्यापेक्षा महत्त्वाचं काहीचं नव्हतं. तर असा हा बालपणीचा पाऊस 🌨
वो कागज़ की कश्ती, वो बारिश का पानी ह्या गझलची आठवण करून देणारा.

• कॉलेजमधला पाऊस
• मनी पाऊस दाटलेला