मनी पाऊस दाटलेला 🌧️

हल्ली पावसाळा जवळ आला कि सोशल मीडियावर पावसाळी मेसेजेसचा पाऊस येतो. मान्सून मात्र त्याच्या हिशोबाने त्याला पाहिजे तेव्हा येतो. आपण लहानपणापासून पावसाला खोटा पैसा देऊन बनवत आलोय, त्यामुळे आता पाऊस आपल्याला बनवतो. हवामान खात्याचे अंदाज हवेवर उडवून लावत पावसाचा धिंगाणा सुरु होतो. मोबाइल अ‍ॅपवर ऑर्डर देऊन ठराविक वेळेत पाऊस मागवण्याची सुविधा अजून तरी उपलब्ध नाही. त्यासाठी निसर्गावरच अवलंबून रहावं लागतं.

पाऊस आवडण्याची लहान-थोरांची वेगवेगळी कारणं असतात. 'ये रे ये रे पावसा' ह्या बालगीतापासून सुरु झालेला आमचा पाऊस वयात येत 'रिमझिम गिरे सावन', 'भिगी भिगी रातोंमे' ह्या युगुलगीतांपर्यन्त येतो. चित्रपटसृष्टीने तर ब्लॅक अँड व्हाइट जमान्यापासून ते आजतागायत पावसातली गाणी भरभरून दिलीयत. 'डम डम डिगा', 'प्यार हुआ इकरार हुआ' ते 'आज रपट जाए'...

काहींना पावसाळ्यात 'गारवा' अल्बममधील गाणी विशेष भावतात. अगदी त्यातील गाण्यांपूर्वीच्या सौमित्रच्या ओळीदेखील आठवतात "मुसळधार पाऊस खिडकीत उभी राहून पहा. बघ माझी आठवण येते का?"... सगळ्यांना आठवण येईलचं असं काही नाही. म्हातारपणी विस्मरण होण स्वाभाविक आहे. 😀

पावसाळा हा निसर्गचक्रातला एक ऋतू परंतु... तुमचा आणि आमचा पाऊस सेम असेलच असं नाही. पावसाच्या सरींत ❤️प्रेमरस ते 🥃सोमरस अशी विविधता मिळते. आपापल्या तब्येतीप्रमाणे आस्वाद घ्यावा. गार गार पावसात निदान गरमागरम कांदाभजी आणि कटिंग चहाला तर कोणाचीच हरकत नसावी! ☕