२३ ऑगष्ट २०२०

मधली सुट्टी - प्रथम वर्धापन दिन

बघता बघता मधली सुट्टी आज वर्षाची झाली. (वर्षाची म्हणजे one year) सर्वप्रथम सर्व सदस्यांचे मनःपूर्वक अभिनंदन !!!💐 एकमेकांना एवढे दिवस सहन केल्याबद्दल 😘. तशी सर्व मित्रमैत्रिणींची साथ होतीच पण विशेष आभार रवीदत्तनीना यांचे, ज्यांनी पुढाकार घेऊन हा ग्रुप ( समूह किंवा टोळीसुद्धा म्हणू शकता ) स्थापन केला. सुनीलने प्रयत्नपूर्वक आमची फक्त मुलांची टोळी बनवली होती व ती आम्ही सर्व गुण्यागोविंदाने चालवीत आहोत, त्याचीच ही पुढील आवृत्ती. 😍

अधूनमधून कन्याशाळा व मुलांचा एकत्रित ग्रुप असावा अशी चर्चा व्हायची तिकडे मुलांच्या ग्रुपवर. (पण मांजरींच्या गळ्यात घंटा बांधणार कोण? 😂) म्हणजे फक्त चर्चाच व्हायची पुढे काही नाही. अशातच एके दिवशी रवीदत्तचा Audio Message मुलांच्या ग्रुपवर आला. त्याने एकत्रित नवीन टोळी बनवण्यासाठी सर्व मित्रांची रितसर परवानगी घेतली. अर्थात नकार देण्यासारखे काही नव्हतं. एकमताने मंजुरी!! निदान आजी-आजोबा होण्यापूर्वी तरी ग्रुप स्थापन झाला. कोणी तरुण आजी-आजोबा आहेत का ग्रुपमध्ये? 😉

लोकशाही असल्याने ग्रुपचे नाव काय असावे? याचीही चर्चा झाली. मी सुचविलेले मधली सुट्टी हे नाव निवडण्यात आले. (तेवढाच भाव खाऊन घेतो) दोन अधिकृत टोळीप्रमुख म्हणजे एडमिन म्हणून नीना व महेश यांची नेमणूक झाली.

बारसं झाल्यावर हळूहळू ग्रुप बाळसं धरू लागला. काहीजण ग्रुप सोडून गेले, काही नवीन आले. पण बरेच सदस्य मधल्या सुट्टीत रमले. एकमेकांचा अंदाज घेण्यात थोडा कालावधी गेला पण आता रूळलेयंत सगळे! काही जण रोज post करतात, काही प्रासंगिक, काही फक्त वाढदिवसाच्या शुभेच्छा देण्यासाठी डोकावतात. काही वाचक फक्त वाचतात. तरीही प्रत्येकजण तेवढाच महत्त्वाचा कारण मैत्रीच्या गोफात गुंफलेले सारे मोती समान मूल्याचे असतात. 😍

विविध क्षेत्रातले विद्वानविदुषी समूहात असल्याने मधल्या सुट्टीत ज्ञानगंगा अखंड वहात असते. पण मधल्या सुट्टीचा POSTer Boy कोण असेल, तर तो संजय के. (आमचे संख्याशास्त्रज्ञ गणेश यांच्या माहितीनुसार संजय के. ने वर्षभरात १२८३ मेसेजेस् पोष्ट केलेत. त्यातले त्याने स्वत: किती वाचलेयतं त्यालाच ठाऊक! 😀)

ग्रुपमध्ये शिक्षक, इंजिनिअर्स, डॉक्टर अशी विविधता आहे. पण ग्रुप चालवण्याची मुख्य जबाबदारी आमच्यासारख्या सामान्य कार्यकर्त्यांवरच आहे. डॉक्टरांबद्दल काय सांगावे! कन्याशाळेत तीन-तीन डॉक्टर आहेत पण आजारी पडलो तर कंपाऊंडरच कामाला येतो. (नाही म्हणायला दात तेवढे सुरक्षित आहेत एका डॉक्टरमुळे 😁) ग्रुपमधील शिक्षकांबद्दल बोलावे, तर बरेचसे सदस्य कोकणातले असल्याने, शिक्षकपण त्यांना जास्त काही शिकवू शकत नाहीत. असो!

मुलांसाठी मधल्या सुट्टीत मेसेज पोष्ट करताना थोडी कसरत असते. फक्त मुलांच्या ग्रुपवर पोष्ट करताना कोणतेच बंधन नसते. अगदी डोळे झाकून कोणताही मेसेज पोष्ट करावा 😜 पण इथे डोळसपणे पोष्ट करावे लागते. नाहीतर म्हणतात ना, 'फट् म्हणता ब्रह्महत्या' तसं 'पोष्ट टाकून आत्मघात'. तरीही सर्वांनी आतापर्यंत जसे तारतम्य बाळगून एकमेकांचे ज्ञान वृद्धिंगत केलेत, तोच वसा पुढेही चालू राहू द्यावा!

शाळेत असताना मधल्या सुट्टीचा कालावधी मर्यादित होता. पण ही मधली सुट्टी अमर्याद आहे. येथे यावे क्षणभर रमावे. ताजेतवाने होऊन नेहमीचे जीवन जगावे. ना स्थळाचे बंधन ना काळाचे! कधीही या मधली सुट्टी आपलीच आहे. (मुलांच्या ग्रुपवर तर पोष्टचेसुद्धा बंधन नाही. मज्जाच मज्जा! 😂)

पुन्हा एकदा मधल्या सुट्टीत बागडणाऱ्या सर्व विद्यार्थी, विद्यार्थीनींचे प्रथम वर्धापनदिनी अभिनंदन!!!💐

You can Like, Share & Comment
- संतूवाणी

माझे शाळासोबती

तुमची प्रतिक्रिया लिहा

वाचकांचे अभिप्राय

दयानंद3 years ago

काय अफाट स्मरणशक्ती काय शब्दांची जुळवाजुळव खुप खुप अभिमान वाटतो तुझा संतू ,1नंबर लेख 👌👌👌💐💐💐

वैशाली3 years ago

संतुवाणी नेहमीच झकास , अलगद सगळ्यांचे कौतुक करणारी आणि हलकेच एखादी कोपरखळी मारून जाणारी 😄👌

निकेता3 years ago

सुंदर

विनायक5 years ago

वाह उस्ताद. तुझे कौतुक करावे तितके कमीच आहे. लेख वाचून खूप बरे वाटते. सगळ्यांना धन्यवाद.

रविदत्त5 years ago

संतोष प्रथम वर्धापन दिनाच्या खुप छान शुभेच्छा वाचून भरून पावलो. सर्व मित्र मैत्रीणींना सहकार्य आणी सहचार्या बद्दल मनपु़र्वक शुभेच्छा आणी धन्यवाद🙏
संतुवाणीने आजचा दिवस खास केला👍😍

विनय5 years ago

मधली सुट्टी प्रथम वर्धापन दिनाच्या खुप खुप शुभेच्छा 💐🎉🎊 संतुवाणी नेहमी प्रमाणे छानच 👍

अवधूत5 years ago

व्वा ! लिहीता लिहीता तूझ्या खुमासदार 🖋️ ग्रुपवरच्या वाघिणींचे तू सहज 🐈 करुन टाकलसच शेवटी. एक वर्ष खरंच फार मजेशीर गेलं. विशेषतः लॉकडाऊन च्या काळातच हा ग्रुप जास्त वाचला जायचा. मनाला उभारी द्यायचा(अन् देतोयही अशा ताज्या स्वप्रतिभेने व्यक्त झालेल्या पोस्ट मुळे)
काही उल्लेख राहीले (ग्रुपवरचे गीताने राबवलेले विविध उपक्रम,प्रशांतची फोटोग्राफी, नीनाचे विविध कलांमधले कौशल्य,कवैय्येगिरी आणि खवैयेगिरी सुध्दा तसेच झूम मिटींगा (इ. इ.) त्याची कसर दुसऱ्या वर्धापनदिनी भरुन काढ. बाकी नेहमीप्रमाणे तुझ्या शैलीत खुसखुशीत लिहिलंयस. साऱ्यांनाच मधली सुट्टी वर्धापनदिनाच्या शुभेच्छा....🌹🌹🌹🙏🏻🙏🏻🙏🏻

विलास के.5 years ago

Excellent! Proud of your humorous writing👏😘
Congratulations to all of us for being together on group and special thanks to administators.

गणेश5 years ago

संतू, मस्त लिहिलेस...अवधूत म्हणतो ते अगदी बरोबर...
गीताने काही उपक्रम वेळोवेळी पेरून ग्रुप हिरवा ठेवला.. सदस्यांची कमाल की त्यांनी त्यास "हिरवट रंग" किंवा "कडवट चव" येऊ दिली नाही.
अभय चे good मॉर्निंग, महेश, राजश्री यांच्या अभ्यास पूर्ण पोस्ट, विनायक, विलास (दोन्ही), शैलेश यांच्या मोजक्या पण वजनदार टीपा, संजय उवाच, अवधूत चे आणि शैलेश चे अध्यात्म, सुनील चे शेर अशा अनेक पोस्ट ने ग्रुप विविध रंगी झाला.... संजय (!) के नाव पुन्हा एकदा चर्चेत आले... 😄 प्रशांत ची फोटोग्राफी, गीता, नीनाचे गाणे मस्तच... तसेच प्रदीप चे रिस्पॉन्स...👌
टीप : संख्याशास्त्र ह्या विषयाशी माझा काही संबंध नाही... 😄

प्रशांत5 years ago

सर्वांचे अभिनंदन 💐 संतोष.... तू नेहमी प्रमाणेच उत्तम 👌👌

अभिजित5 years ago

अभिनंदन...संतोष..उत्तम...

प्रदीप5 years ago

खरंय मित्रा, शाळेत असताना कधी मुलींशी न बोलणारे आपण बरेच जण..एकत्र ग्रुप म्हटल्यावर अजुन ही भिडस्त राहिलों..पण तरी maturity आल्याने एकमेकांना समजून घेतले, व एकमेकाशी थट्टा मस्करी करण्याइतपत समरस ही झालो..
आयुष्याच्या या वळणावर मागे काय ठेऊ..तर निदान एकमेकांची आठवण आणि एकत्र घालवलेले हे काही क्षण तरी yaadgar म्हणून ठेऊ.
ह्या ग्रुप मुळे खूप मित्र मैत्रिणी चे नवे पैलू ,कलागुण आपल्याला नव्याने अवगत झाले..मला ही मधल्या सुट्टीच्या पुढच्या इयत्तेत जाताना सर्वांचेच आभार मानावेसे वाटतात.🙏🙏 ज्यांनी आपल्याला एकत्र आणले..प्रत्यक्ष अप्रत्यक्ष पणे समजून आणि सामावून घेतले..त्या सर्वांचे आभार..एवढे सगळे छान सोबती दिले त्याबद्दल त्या देवाचे प्रथम आभार🙏🙏
टीप:-संतोष तुझ्या लेखन कौशल्या मुळे मलाही व्यक्त होण्याची इच्छा झाली👍 दोस्त लिखते रहो..!जिते रहो..!🙏

सुनील5 years ago

नेहमीप्रमाणे खुमासदार, मस्तच 👌🏽👌🏽👌🏽👌🏽

नीना5 years ago

संतोष सर्व प्रथम तुझे मनःपूर्वक अभिनंदन 💐
तुझे कौतुक करावे तितके कमीच...तुझ्याबद्दल बोलताना शब्द अपुरे पडतात. तुझ्यातली प्रत्येक कॅरॅक्टरला डिफाइन करण्याची क्षमता माइंड ब्लोईंग...माझ्या सगळ्याच मित्र मैत्रीणींनी ग्रुप इनटॅक्ट ठेवला आहे...यात दुमत असण्याचे कारणच नाही..मला फारसे बोलता येत नाही पण मधल्या सुट्टी च्या आजच्या प्रथम वर्धापन दिनानिमित्त चारोळी...
मैत्री "अशीच असावी,
मैत्री म्हणजे मायेचा पखरण....
प्रवाहा सम वाहती हवी तीथे नेणारी
मेणाहुनही मऊ हवी तशी आकारणारी
सोन्यासारखी झळाळणारी मैत्रीचा कस दाखवणारी
भरकटलेल्या पाखराला घराची वाट दाखवणारी,
सुकलेल्या फुलांना बहर आणणारी,
दुखाच्या वाळवंटात प्रेमाचा पाझर आणणारी,
एकटेपणात सहवासाचा दिलासा देणारी,
शब्दाविणा सर्व काही समजून घेणारी,
न सांगताच डोळ्यातील भाव ओळखणारी...
मैत्री "अशीच असावी.....
मैत्रीच्या या नात्याबद्दल लिहीण्यासारखे बरेच काही आहे पण...राहिलेले प्रत्यक्ष भेटीत...

शैलेश डी.5 years ago

Dear Santhosh, Awesome 👍🏻👍🏻👍🏻🙏🏻🙏🏻

संजय डी.5 years ago

वर्धापन दिन विशेष प्रोप्रा. संतुवाणी 🤓
भलेही दृष्टी दिपवणारा आधुनिक मॉल नसला तरी संतुवाण्याचा सिझनल स्टॉल आम्हाला भलताच प्रिय आहे.👍
त्या त्या प्रसंगानुसार लागणारा माल (हिरवागार अगदी ताजा) मिळणार याची खात्रीच असते. आज काय इव्हेंट आहे ते त्याच्या आरोळीनेच (लेखाने) आम्हाला कळतं. बरं, मालात एकसुरीपणा अगदी औषधालाही नसतो. (कोणी कंपाऊंडर असल्यास क्षमा मागतो, डॉक्टर समजून घेतिलच 😉) नेहेमीच नाविन्य.
मी जे देऊ करतो ते माझ्याशिवाय त्रिभूवनात कोठेही मिळणार नाही असा आविर्भाव 🤨 असल्याने कितीही नाही म्हटलं तरी स्टॉलचा खाक्या पुणेरी (तेव्हढीच जवळीक साधायचा प्रयत्न😬) असल्याचं जाणवतंच.
खोगिरभरती टाळून, आकर्षक वेष्टणं 🎇 असलेल्या मालावर उड्या पडतात आणि हातोहात खपतो. एवंगुणविशिष्ट अशा स्टॉलची अन्यत्र कोठेही शाखा नसेल हा केवळ आमच्यापुरताच कयास बरं का🙏🌹
सर्व गिऱ्हाईकांना वर्धापन दिनाच्या अगणित शुभेच्छा.🥳🥳

विलास पी.5 years ago

संतू वाण्याची बारीक नजर आहे तर टोळीवर ... 🙂 लिखाण नेहमी प्रमाणे खुमासदार 👌🏼

विकास सी.5 years ago

“वर्धापन दिन विशेष “ संतु वाणी ॲडमीन नीना तसेच इतर मित्र मैत्रिणींचे लिखाण ग्रुपप्रमाणेच जबरदस्त!!! सर्वांचे हार्दिक अभिनंदन!!!! आपल्या सर्वांचे प्रेम व मैत्री अशीच वृध्दिंगत होवो!!!! 💐💐💐💐💐💐💐💐💐💐

विनोद5 years ago

संतोष अप्रतिम !! तु खरोखरच तुझा ब्लॉग चालु कर !!

दीपक5 years ago

अभिनंदन

नरेश5 years ago

👌👌👍🙏

प्रसाद5 years ago

बेष्टच! 👌🏼👌🏼👌🏼

विजय5 years ago

अप्रतिम संतोष

संतोष एम.5 years ago

👌🏻👌🏻👌🏻

सुनीता5 years ago

खुप छान 👌👌🙏
Read more in this section:
वर्गशिक्षक: दहावी-अपी.टी. चा तासआठवणीतील बोंबाबोंब५० मार्कांचं संस्कृतगुगलचे मीठ अळणी७ वा वर्धापनदिनबॉईज ओन्ली - चर्चासत्रप्रसादचे पेनबंधमधली सुट्टीसुगंधी उटणंश्रावणातील स्नेहसंमेलनकन्याशाळेची भिंतस्नेहसंमेलन २०२१@ मुलुंड पोलीस स्टेशनमुलुंड ते काळाचौकी
Close Video ❌
Share