माझी व्यायामाची शाळा 🏋️ - पूर्वार्ध

हो ! तुम्ही बरोबर वाचलयंत. कोणे एके काळी माझ्या व्यायामाची शाळाचं झाली. कारण माझे व्यायामशाळेत प्रवेश घेण्याचे निमित्तचं तसे होते - मैने प्यार किया मधला प्रेम म्हणजे, सलमान.

माझ्या वयाच्या बहुतेकांनी बघितलाचं असेल हा सिनेमा आणि सिनेमा आवडण्याचे प्रत्येकाचं वेगवेगळं कारणही असेल. त्या सिनेमात सलमान एकदम सुकुमार दिसत होता. एक-दोन सीनमध्ये सलमान व्यायाम करताना दाखवलायं. तेव्हा लयं भारी वाटला होता. तसही कॉलेजात असताना काय आवडावं, काय आवडू नये ह्याला लॉजिक नसतं. सुमन म्हणजे आपली भाग्यश्रीपण कसली सुंदर दिसली होती!

कॉलेजच्या गुलाबी(?) दिवसांत असे चित्रपट बघितले की 'आपल्यालाही गर्लफ्रेंड असावी बुवा' अस वाटतं काहीजणांना (बऱ्याचजणांना). ते कंपलसरी नसतयं पण आपलं वाटतं! 😍

कॉलेजात जाऊन दोन वर्ष झाली तरी गर्लफ्रेंडचा पत्त्ता नव्हता. काही मित्रांना मुलींशी मैत्री करायची कला अवगत असते. पण आमची गत अशी होती कि बसमध्ये पुढे मुलगी असेल आणि आपल्याला स्टॉपवर उतरायचे असेल तर तिला 'एक्सक्युज मी' म्हणणं पण जीवावर यायचं. म्हणजे 'आय लव्ह यु' म्हणेपर्यंत जीवचं जायचा 😀 (आमच्या शाळेत चौथीनंतर मुलामुलींचे सहशिक्षण नव्हते, त्यामुळे हा न्यूनगंड वा अहंभाव निर्माण झाला असेल का? संशोधनाचा विषय होऊ शकतो)

माझा असा एक गैरसमज होता, कॉलेजमध्ये मुलींना इंप्रेस करायचे असेल तर आपण खूप स्कॉलर असायला हवे किंवा आपली पर्सनॅलिटी डॅशिंग हवी. आमची दोन्हीकडे बोंब! बुद्धी सुमार आणि यष्टिसारखी शरीरयष्टी. बुद्धीचं काही करता येण्यासारख नव्हतं, म्हणून कदाचित स्कॉलर होण्यापेक्षा बॉडीबिल्डर 💪 होण सोप्पं वाटलं तेव्हा.

तर बिल्डिंगमधल्या मित्रांसोबत 'मैने प्यार किया' बघून आलो आणि ठरवलं व्यायामशाळेत जायचचं. त्याकाळी आमच्या एरीयात आत्तासारख जिमच पेव फुटल नव्हतं. सिक्स पॅक वगैरेचा फंडापण नव्हता, फक्त तब्येत कमावायची एवढीच अपेक्षा. सोबत अजून दोन मित्र होते. त्यातल्या एकाला व्यायामाची थोडिफार आवड होती, दुसरा मैत्रीखातर गंमत म्हणून तयार झाला. आम्ही तीन मित्रांनी जवळच्याच देवदत्त व्यायामशाळेत प्रवेश घेतला. पुढे काय झालं?... 🤔